Kali Serayu ora baen-baen riwayate. Nganut dongene para kasepuhan, sing gawe kali serayu kuwe Raden Werkudara utawa Bimasena, satria penengah Pendhawa, sekang Jodhipati laladan Negara Amarta. Sawijining dina, antarane Kurawa karo Pandhawa nganakna lomba gawe kali. Bubar kesepakatan rong keluarga gedhe antara Kurawa sing dipandegani Durjudana karo Pendhawa sing dipandhegani Puntadewa, saklorone langsung padha ngatur siasat.

Pendhawa langsung pada tapa brata semedi nenuwunmaring Gusti Sing Murbeng Wasesa, keprimen kareben oleh pitulungan lancar nggone gawe kali. Mbarang Kurawa apa maning semedi tapa brata, maca donga acan be ora kober, terus nggejugi lemah gawe alur kali. Sebab balane akeh, mulane gawe kali sing cepet katon hasile. Ing dalem wektu sewulan bala kurawa wis teyeng gawe kali ngoler-oler dawa banget, njujug maring segara kidul.

Petruk karo Gareng sing weruh kahanan kaya kuwe dadi panik, ngira gaweane wong Kurawa meh tekan segara. Punakawan loro sengasaya bingung, bareng weruh bendarane wong lima egun pada ngleker kabeh, khusuk semedi nang gunung Dieng sing anyes jejes. Petruk Gareng ngorong-ngorong nggugah bendarane. “Bendara, wungu lah, ge keluarga Kurawa meh rampung nggone gawe kali, mengko ora wurung kalah cepet nggone gawe kali, berarti kalah perang Bharatayudha sebab kali kiye klangenane para Dewa. Ndara Bima, wungu!”kaya kuwe ngorong-ngoronge petruk karo Gareng.

Ditunggu sedina sewengi nganti wetenge kencot bendarane ora wungu-wungu, akhire metu akale. Petruk narik wulu cumbu, utawa rambut sing metu nang jempol sikile Raden Bimasena. Bareng  rambute dibedhul ----hiiiii…mesthi lara banget ya----Bimasena tangi gregah gereng-gereng nahan lara. Bareng ucek-ucek mripat, katon ana Petruk karo Gareng  agi pating ndhepepes keweden. Ora mikir suwe Punakawan loro ditendang lan diklepatna. Mesthi bae Petruk karo Gareng nangis nggarung-garung, nganti nangekna Puntasewa, Harjuna, Nakula, lan Sadewa.

Bareng suasana wis temata kabeh, Petruk karo Gareng nyritakna, kahanan sing nembe dideleng, yakuwe anane keluarga Kuru sing agi pada gawe kali wis ngoler-oler dawa banget. Para bendarane diaturi leren nggone tapa brata, wis wayahe temandang gawe kali. Angger ora age-age dimolahi bisa kalah, ora ngkur isin karo wong Kurawa ning uga isin karo para dewa.

Bimasena takon sekang ngendi nggone arepan gawe kali, lan kepriwe carane, nganggo alat apa. Semar sing minangka dadi tetuane punakawan aweh pituduh, Bimasena kudu gawe kali sing beda carane karo Kurawa. Bimasena ora nggawa gejug utawa pacul, ning nganggo linggane Bima. Mulane Bimasena kudu nglukar kabeh sandhangan, terus mlaku gawe kali karo linggane.

Temenan, bareng nggugu warahe Semar, Bimasena lancar gawe kali. Ora ana sing wani ngganggu karo Bimasena sebab kabeh ngerti angger Bimasena kuwe satria sekti mandraguna. Siji-sijine sing ngganggu ngkur kewan yuyu, sing gawe gregeten Bima mulane yuyu-yuyu kuwe dipithesi, akibate nganti seprene yuyu sawah ana pinggetane nang awak bekas pithesan sekang Bima. Bareng genep 40 dina, kaline rampung tekan segara kidul, para Kurawa malah ora rampung, nganti kaline disambungaken karo kali gaweane Bima. Kali gaweane Kurawa buthek terus, banyune kaya nggawa awu, mulane dijenengi kali Merawu, asal tembung memper awu. Kali gaweane Bima apik banget, ibarate bocah wadon ayu, mulane dijenengi  kali Serayu. Tuk kali Serayu, dijenengi Bimalukar sebabe nang kono Bima wuda mbegejet, molai gawe kali nganggo linggane sing critane gedhe dawa tur landhep.

Jenenge bae dongeng ya ora kabeh bener kaya nyatane. Sing baku, saiki ana kali serayu sing menggak-menggok kaya ula naga, sekang gunung Dieng nganti Segara anakan, dawane 100 km lewih, ngliwati kabupaten Wanasaba, Banjarnegara, Purbalingga, Banyumas, lan Cilacap. Kira-kira ana wong 8 juta sing uripe gemantung karo kali serayu, mbuh nang babagan pertanian, perdagangan, perikanan, transportasi, kesenian, lan uga pariwisata.

Banjarnegara agi getol-getole mbangun wisata kali Serayu. Dasar pemikirane ora sebab dongeng nang dhuwur mau thok, ning kali kuwe papan sing wigati banget, dadi sumber penguripan mangewu-ewu malah majuta-juta menungsa. Mulane ora mohal wiwit jaman mbiyen kaki ninine dhewek angger gawe desa kutha sing akeh-akeh milih pinggir kali.

Sing gawe kuciwa egun akeh sedulur sing ora ngregani kali. Buktine kali ngkur nggo mbuang  kotoran, mbuang tinja, mbuang limbah, lan sapanunggalane. Mangkane angger cara manca Negara, kali dadi kaca benggala peradaban. Kali diemi-emi, dirumat pinggirane, dijaga resik lan beninge banyune, dijaga tuke, diuri-uri iwake lan rumatan liyane kalebu sedhekah kali, sing intine njaga aja nganti kali ilang kedhune, asat banyune, ludhes iwake.

Kali Serayu salah sijine kali sing penting, mulane uga wajib dijaga. Salah sijine nganggo dalan ndadekna obyek wisata. Carane pinggir kali diapik-apik, digawe taman, diadegna penginepan kanthi piandel sesawangan kanan kering kali, malah-malah kali Serayu kena nggo arung jeram utawa rafting, utawa praon nganggo prahu karet sekang ndhuwur desa Tunggoro kecamatan Sigaluh tekan Rejasa kecamatan Madukara. Sauwene rafting wisatawan disuguhi sesawangan pinggir kali sing endah, teyeng ciblon, nglangi, nyilem, kecehan kaya bocah cilik, lan dolanan banyu apa bae. Nang tengah rafting disuguhi dewegan krambil ijo karo tempe mendhoan. Angger wis rampungan, disuguhi dhahar awan lawuh iwak kali. Kehebatan rafting kali serayu wis molai kondhang ora ngkur level nasional ning internasional, mulane kejuaraan rafting internasional wis tau nang kali Serayu.

Kanthi ngupakara kali Serayu, moga-moga kanugrahane Gusti Allah sing regane tanpa wates tetep lestari. Mayuh kabeh warga Banjarnegara, lan Banyumas, pada njaga kali Serayu. Senenga nandur wit-witan supaya lemahe seret, aja ngracuni iwak kali, aja mbuang uwuh utawa limbah nang kali.

Para sedulur kabeh nang endi bae, mayuh pada maring Banjarnegara, nyoba wisata kali seryau, sare nang pinggir kali, maksude nang hotrel pinggir kali  Serayu, praon nang kali Serayu, mriksani taman lan sesawangan endah kali serayu, sing mapan nang Kabupaten Banjarnegara. Mangga, sugeng rawuh.

Klilan…*** (hadi-supeno).